ថ្មីៗនេះ ក្រុមបងធំទាំង ៥ របស់ Ferrari ឬ Ferrari's “Big Five” ដែលប្រមូលផ្ដុំដោយរថយន្ដម៉ូដែល legendary របស់ Ferrari ៥ ម៉ូដែល តាំងពីឆ្នាំ ១៩៨៥ មក នឹងត្រូវដាក់ដេញថ្លៃ ក្នុងកម្មវិធី DARE TO DREAM COLLECTION រៀបចំដោយ RM Sotheby’s ដែលនឹងចាប់ផ្ដើមក្នុងពេលឆាប់ៗ ជាមួយនឹងការរំពឹងទុកថានឹងកើបលុយបានមិនតិចជាង ២០ លានដុល្លារ។

តាម HypeBeast បានឲ្យដឹងថា collection នេះ ត្រូវបានរៀបចំឡើងដើម្បីបង្ហាញពី បម្រែបម្រួលនៃការអភិវឌ្ឍលើវិស្វកម្ម រថយន្ដដែលមានកេរ្ដ៍ឈ្មោះល្បីល្បាញរបស់ Ferrari និងដើម្បីទាក់ទាញអតិថិជនអ្នកដែលគាំទ្រ​ ស្រឡាញ់ឲ្យតម្លៃរថយន្ដ legendary ទាំងនេះ។ 

ក្រុមបងធំទាំង ៥ នេះ ចាប់ផ្ដើមពី 1985 Ferrari 288 GTO ដែលជាប្រភេទ supercar ដំបូងគេបង្អស់​របស់ Ferrari ផ្ទាល់ បំពាក់ម៉ាស៊ីន twin turbo V8 ដែលជារថយន្ដមួយជំរុញឲ្យឈ្មោះ Ferrari ផុសឡើង ក្លាយជាម៉ាកសញ្ញារថយន្ដបែប high performance ឈានមុខគេពេលនោះ។ 

ទី ២ គឺ 1990 Ferrari F40 ដែលជាម៉ូដែលមានចំនួនកំណត់ ឬអាចថាកម្រមួយ ដែលផលិតឡើងដើម្បីអបអរសាទរខួប ៤០ ឆ្នាំ របស់ Ferrari ប្រើប្រាស់ម៉ាស៊ីន twin turbo V8 ដូច 288 GTO ដែរ ដែលល្បីខ្លាំងនៅពេលនោះ ដោយការរចនាម៉ូដប្លែក និងសមត្ថភាពបើកបរខ្លាំងរបស់វា។ 

ទី ៣ គឺ 1996 Ferrari F50 ជាម៉ូដែលល្បីខ្លាំងនៅកំឡុងទសវត្សទី ៩០ បំពាក់ម៉ាស៊ីនដែលជា aspirated V12 ផ្ទាល់ពីរថយន្ដប្រណាំងរបស់ F1 របស់ Ferrari តែម្ដង ផ្សំបញ្ចូលគ្នារវាងបច្ចេកវិទ្យាប្រើក្នុងឡានប្រណាំង និងបច្ចេកវិទ្យា តម្រូវការរត់លើផ្លូវធម្មតា។ 

ទី ៤ គឺ 2003 Ferrari Enzo ជាម៉ូដែលធ្វើឡើងជាការរំឭកដល់ស្ថាបនិកបិតា Ferrari លោក​ Enzo Ferrari និងជាការបើកទំព័រសតវត្សថ្មីរបស់ Ferrari វាត្រូវបានបំពាក់បច្ចេកវិទ្យារថយន្ដប្រណាំង F1 របស់ Ferrari ផ្ដល់នូវសមត្ថភាព performance កម្រិតខ្ពស់។ 

និងចុងក្រោយទី ៥ គឺ 2015 LaFerrari បំពាក់ម៉ាស៊ីន Hybrid V12 ដែលជា supercar ដំបូងបង្អស់របស់ Ferrari ដែលប្រើប្រាស់ប្រព័ន្ធ Hybrid និងក្លាយជាការបើកផ្លូវនៃការផ្លាស់ប្ដូរបចេ្ចកវិទ្យាម៉ាស៊ីនរថយន្ដ supercar ថ្មីៗ សម្រាប់ឧស្សាហកម្មរថយន្ដ supercar ទាំងមូល។

រថយន្ដទាំង ៥ នេះត្រូវបានគេរំពឹងថានឹងទទួលបានតម្លៃដេញថ្លៃយ៉ាងហោច ២០ លានដុល្លារ ជាក់ស្ដែងគ្រាន់តែ 288 GTO តែឯងអាចដេញបានដល់ ៤ លានដុល្លារ យោងទៅតាមការឲ្យដឹងពី លោក Ian Poulter ម្ចាស់ដើមរបស់វា, F40 អាចដេញបាន ៣​ លាន ២៥ មុឺន (៣ ២៥០​ ០០០ ដុល្លារ)​, រីឯ F50 វិញ អាចបានដល់ ៤ ៥០០ ០០០ ដុល្លារ ឯណោះ, ចំណែកឯ Enzo និង LaFerrari អាចដេញបានមួយ ៤ ២៥០ ០០០ ដុល្លារដូចគ្នា។

គួរបញ្ជាក់ថា ម៉ូដែលទាំងអស់នេះ សុទ្ធតែជារថយន្ដល្បីល្បាញ មានកេរ្ដិ៍ឈ្មោះ តដំណែលគ្នាជាយូរ ដោយមិនចាំបាច់តែ ក្លាយជាម្ចាស់របស់វាទាំង ៥ នោះទេ គ្រាន់តែជាម្ចាស់តែ ១ គ្រឿងនេះ ក៏ជាក្ដីស្រមៃមួយសម្រាប់អ្នកចូលចិត្តប្រមូលឡាន (Car Collector) ដែរ​ ដោយមានន័យថា បានជាប់ឈ្មោះជាអ្នកស្នង និងថែរក្សាមរតករបស់ Ferrari។ 

អត្ថបទ៖ Andra 

ប្រភព៖ HypeBeast 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!